Cewang dilangik lah lamo Pai
Lah Abih Pulo Umpan Dek Aia
Iman Baganti Pangana Ilang
Antah Dimano Jalan Kapulang
Nagari Rancak Marwah Kok Hilang
Marawa Kuyuik Dek Labek Hujan
Manangih Bundo Dirumah Gadang
Oi Anak Oi, Bilo Lai Kasumbayang
Antah Kok Mamak Salah Pituah
Antah Kamanakan NAn Salah Tarimo
Iduik Baraka Mati Bariman
Aka Panjang Iman Kok Ilang
Suluah Bendang Dalam Nagari
Urang Cadiak Dimanyo Kini
Ya Allah Tuhan Allahu Rabbi
Agiah Pitunjuak Anak Kamanakan Kami
Slamaikan Juo Nagari Kami
Minangkabau Pautan Hati
Disabuik Sado NAn Tau
Nan Tingga Untuk Nan Santiang
Kok Banyak Salah Jo Sumbang
Sabaleh Jo Kapalo Ditakuakan
Kanan Pandai Kito Baguru
Mamintak Kita Ka Nan Satu
Di ranah bundo Minangkabau ko ado ampek macam kato-kato, atau caro manyampaikan parundiangan. Ado namonyo kato mandaki, dari bawah ka ateh, aratinyo dari anak-anak ka urang tuo, dari kamanakan ka mamak, nan samustino mamakai caro-caro sopan santun. Talabiah-labiah bakeh urang tuo (bapak mandeh) nan alah malahiakan kito, manggadangkan jo maaja awak.
Sasuai bana jo ajaran agamo Islam, kok mangecek ka mandeh nantun bapakaikan qaulan kariman, aratino kato-kato nan lamah lambuik, kato-kato nan panuah ka muliaan.
Ado pulo namono kato malereang, nan panuah ba isi kieh jo bandiang, baisi patunjuak jo pangaja, biasonyo di pakai dalam pambicaraan antaro urang arih bijaksano. Ado lo tampek malatakkanno. Indak hanyo sakadar mambaco apo nan tampak, tu. Inyo indak mangecek apo nan takana, tapi labiah dahulu mangana-ngana apo nan ka di kecekkan. Buah tutua nyo [anuah baisi hikmah pangaja. Kadang-kadang batingkah jo pituah jo papatah. Aluih tasamek di dalam bana, ta latak di dalam hati, sajuak di kiro-kiro.
Ado lo namono kato mandata, kato bajawab gayuang basambuik samo gadang. Kadang baisi galuik jo garah, paningkah lamakno pagaulan. Indak manyingguang suok kida, panguek buhua rang mudo-mudo, abih tingkah dalam garah, kato palanta dek rang saisuk, nan elok ka pangaja, nan buruak samo di tingga-an. Ingek-maingekkan adaik hiduik dek nan mudo, indak mampabia kawan tatungkuik, indak manuhuak kawan sairing, indak mangguntiang dalam lipatan. Baitu adaik samo gadang, disinan iduik mangkono sero.
Ado lo namono kato manurun. Dari nan gadang ka nan ketek, baisi nasihaik jo pitunjuak, ka jadi padoman dek nan ketek. Panuah baisi kasih jo sayang, manjadi suri jo tauladan. Jarang ba-isi kato bangih, jauh nan dari hariak jo berang, indak pulo mahantak kaki, jauh dari manampiak dado.
Baitulah, kalau kato nan ampek ko lai tatap jadi paratian kito, Insya Allah di dalam hiduik di dunia nan fana ko kito ka salamaik, dan di akiraik tantu kita ka bahagia pulo. Salanjuikno kito bisa pulo maninggakan katurunan (genrerasi, kato rang kini) nan arih-bijaksano, nan bisa manjadi pamimpin di tangah-tangah kahidupan urang banyak.
Buruak sabuik di ranah bundo, kalau rang minang indak tau lai di nan ampek ko. Indak tau di nan bana, indak lo tau di nan salah. Indak tau di nan di suruah. Indak lo tau jo nan di tagah. Alamaik sansaro badan jadino.
Urang nan bijaksano, hanyolah nan tau di alamaik maso lalu, tau di tujuan maso datang, tau di jalan nan sadang batampuah, tau lo di tampek parantian. Baitulah handakno hiduik nangko.
Mudah-mudahan Allah Subhanahu Wa Ta’ala salalu mambimbiang kito kapado ka arifan nan alah di ajakan dek alam ta kambang nan jadi guru ko. Insya Allah.
"Oi nak bungsu Siti Budiman , upiak kamari malah duduak, elok kito badakek dakek, elok kito bampiang ampiang, nak tahu dipadeh lado, nak tahu dimasin garam, nak dapek paham jo mukasuik, barundiang sapatah duo patah, nak masuak kahati kau, amak kito bapadu badan amak batuluak jo baandaialah kok dapek tu nak kanduang ilmu urang basuami?"
Manyahuik Siti Budiman: "Kok itu mandeh tanyokan, mandeh malihek tiok hari, hambo indak turun tanah, gilo diateh rumah sajo, indak bajalan kiri kanan , siapo pulo kamaajari? Mandeh lah lamo manunjuakkan, mandeh lah lupo tantang itu."
Manjawab Siti Juhari:"O nak denai Siti Budiman , makan pahamnyo habih2, dangakan pangaja mandeh kanduang, pituah niniak kanduang kau, iyolah ayah kanduang mandeh, bagala Tuanku Rajo Bana." Tantang ilmu urang basuami, kok sampai anak bajunjuangan , pabaiak piiek kalakuan, paelok laku jo taratik, datang suami dari jauah, sambuiklah jo muko manih, hidangkan minum jo makannyo, paliekkan ati nan suci. Kok barundiang samo gadang, aibnyo nan usah dibukakkan, sabagaimano akal budi, tutuik dek upiak mati mati, saangok jan mangok, saangin jan buliah lalu, parik paga dianak kanduang tapi usah talampau bana, kok tampak pulo budi awak, manungkuih tulang jo daun taleh, manyuruak dibawah lumbuang, kana pulo tu nak kanduang.
Inyo kok indak datang amek, atau kok inyo indak kunjuang pulang, jan maupek tantang nantun, kana kok inyo sadang sansaro, rida jo saba dipaliekkan, urang saba kasihan Allah. Kok maraso raso juo kok indak manyanang diati, liek inyo sadang suko, sadang duduak surang, ajak saketek bakucindan, sambia manyingguang jo kiasan. Kalau suami urang baiak, gadang raso dalam atinyo, inyo dicancang jo nan maja, jan dicatuak jo nan tajam
Ciek lai bundo katokan tantangan makanan jo minumannyo salalu sadiokan dek upiak, tasaji baiak ateh dulang. Kok datang urang mananyokanyo dan inyo sadang
bajalan , baduto upiak saketek, asuang pitonah jan lalu, baru turun sabantako alun jauah lei inyo bajalan.
Kok anak nak kapakan mamintak izin bakek inyo, kok upiak naiak bendi nan usah sabendi jo urang lain nan bukan dunsanaknyo. Jiko sabendi jo urang lain basingguang kain samo kain itu pantangan urang tuo, mato palingan setan, ati palingan Allah, abih gili dek galitik, hilang malu dek biaso. Kok padusi indak pamalu, jadi cacek saumua hiduik, bak pintu indak bapasak, mudah rang maliang mamasuki, bak parahu indak bakamudi, biaso sasek dalam balayia.
Oh upiak sibiran tulang, pagang bana pituah mandeh, buhua dalam kabek pinggang, buruak urang dek lakunyo, roman nan indak dapek diubah tapi laku jo parangai lai dapek.
Kok basuo jo urang lain kok duduak ditangah rami atau didalam alek jamu, caliak nan usah dipatinggi, mato usah dipalia, pandang sakali lalu sajo, usah galak dipabahak.
Lambak nan dari pado itu, sopan dan santun tak babateh, baso jo basi tak bahinggo, bia jo laki awak bana, janlah ilang baso basi, pamanih muluik upiak tu, gadangkan inyo ditangah rami, muliakan inyo dimuko rapek.Sekian sedikit kutipan. Tantang Adaik barumah tanggo.
Wassalam,
Bundo nan masih rangkik2 dan latiah dari bajalan jauah,
Tidak ada komentar:
Posting Komentar